Ambahanun kang Binukot
(samtang ginalantaw ang Tribu Binanog
nga nagapasundayag sa USA Football Field)
Elsed S. Togonon
Wara it patimaan ang akun pag-amba
Sa pagsaot kang mga tribo kadya nga aga.
Kuon nanda ang akun kanta wara gasantu
Sa pagpatikpatik kang paglinagabung kang tambol.
Mabasol bala nanda ako,
Kon ang patik nga akun ginapasantu
Halin sa daghub kang akun kasingkasing
Nga nagadasig samtang akun ginalantaw
Ang imong pagkumpas kag pagki-ay k-iay?
Wara gid takun naglaum
Nga sa akun pagsaug halin sa iraya
Agud ihalad ang amba kang maragtas
Nanday Humadapnon kag Ginbitinan,
May sangka hangaway nga magbihag
Kang nabukot ko nga tagipusuon.
Ay, maambung nga hangaway,
Pamatii ang akun nga ambahanun
Sa pihak kang kagahud kag siyagit.
Hay bisan ang akun nga dagway
Lipud sa imo nga panuruk,
Kag ang akun kahig indi makalapak
Sarang ko nga idihon ang hangin
Agud likupan ikaw kang akun
Gugma kag kaanyag.
Sirum sa Villa Igang
John Iremil E. Teodoro
Maramig nga kurtina ang manipis nga tarithi
Kadya nga sirüm nga nagakurisüng ang kalangitan.
Wara it padaüg ang kalayo sa ginsalpan,
Ginapatay kadya ang gamay nga kalipay sa akün düghan.
Nagapanapüg kang lao kag asin ang hünasan
Turog ang mga hilamon kang dagat nga siguro
Bilog nga adlaw nagsaut sa kuryente kang tubig
Kag hampak kang mga ikog kang isda nga wara’t labüt.
Sa unahan may puti nga daray-ahan,
Nagpamaypay dya kanakün sa anang kasübü.
Kon madalagan ako paagto rugto,
Masug-alaw ko ayhan rugto ang imong kalag?
Mabatyagan ko ayhan ang kainit kang imong küpküp
Kon magdamhag ako sa basa nga baras?
Naghuruni rün ang mga kikik, palangga.
Kinahanglan ko rün magsindi kang kandila
Kag mangadi para sa kalinüngan kang akün düghan.
Dagu-ob
Norman Darap
Ako, isra sa mga nara
nga nagtubo sa wayang,
napatung-an kang mga lantyog
kag bahol nga kawayan,
ang akon mga ugat naglalapyo
sa kamara kang duta
nga tatlo na katuig nga wara
nailigan kang uran.
Ang panit kang akon lawas kag butkon
nag-amat-amat mara kag nagkataraktak
sa biti kang init,
mga nabilin kag nagaararangot ko nga dahon
ginhuyop ron kang kapaang.
Kami tanan nagpangamuyo
kag mabuhay nga naghinulat,
hasta ang mga ambon
nagdamol,
naggal-um kag nagpasirak kang kilat,
ti kami naghirinugyaw sa marapit
nga pagdahog kang uran,
ugaring ang kadulum wara gid ti may gin-agtunan.
Kami nadulman kag ginpasarig lang
sa tingug nga gasinggit
kang wara kapuslanan.
Isa ka Baso sang Coke
Romellaine Xyene Laud Arsenio
Atubangay sa lamisa,
tulukay,
tulok kun diin,
tulukay liwat.
Gauyang sang tsempo,
sa indi malinong nga kahipuson.
Imni isa ka lab-ok.
Kaon gamay ng tinapay.
Ibuka ang baba.
Kun may ma gwa nga tinaga,
sigiha hambal.
Kun wala,
imni liwat.
Pero,
kun maubos mo na,
ang isa ka baso sang coke,
kag wala ka pa kaimbento sang mapatihan nga rason,
kun ngaa may lipstick sang bayi sa imo bag...
Indi na maghambal pa.
Ibutang na lang ang baso sa lamisa kag magtindog.
Tultulan mo man ang pertahan
Wala ko pa ina nasirhan halin pag-abot mo.
Matindog naman ko.
Hugasan ko pa,
ang baso kag platito.
Para handa na ini,
kun may mag-abot nga bisita.
Kahidlaw
Krisha Vyn Tinambunan
Indi na gid ako kahulat
nga magpabugnaw naman sa payag-payag.
Maupod digto si Apoy nga naga-mama,
kag magkadlaw sa akun huna-huna.
Katingalahan gid abi ang ginaum-om
nia sa iya nga baba,
kun buyo gid man o kun batwan?
Kato kag Tulad
Danielle Parian
Dumduman ko pa kang ang haruk ko
husto run nga maka pa ngirit kanimo.
Katong ang mga mabinulawanon mo
nga sugilanon husto lang mka pahipos kanakun.
Katong ang mga papel nga ginkurisan mo ka
mga tinaga
husto lang maka patunaw
ka akun nga tagipusuon.
Kang ang oras daw gina lagas ta,
indi gusto ipakawat sa naga dulom nga kahapunanon.
Tulad, atun dun ang oras
waay run gina lagas, diin ikaw?
Ga rapta run ang papel,
waay ti sinulat, mga tinaga nga tunaw.
Ga atubangay, waay ti ga mitlang
napan-us lang ang laway.
Kag ang haruk indi run mka pangirit
isa ka kuhit, dayon lang pang hay hay..
Karon ang pamangkot, diin run ikaw?
kadyang tanan nga oras gin ta-o run kanatun?
Kataraka run bala ang adlaw-adlaw
nga ginhimo para kanatun?
Mahimo bala nga ang paghigugma ko kanimo
nag papagtik sa nakib’lan mo nga tagipusuon?
Walang komento:
Mag-post ng isang Komento